Nodau ac Amcanion

Mae Tai Ceredigion wedi cael ei sefydlu gyda’r weledigaeth o fod “yn landlord ac yn gyflogwr dwyieithog o’r math gorau un sy’n rhoi tenantiaid yn gyntaf, yn darparu cartrefi o safon ac sydd o fudd i gymunedau a’r economi leol”. 

Bydd Tai Ceredigion yn gallu buddsoddi yng nghartrefi tenantiaid a gall, yn hyderus, ddod â chartrefi i fyny at Safon Ansawdd Tai Cymru a sicrhau y caiff tenantiaid wasanaethau o ansawdd uchel.

Gwnaiff Tai Ceredigion ymgynghori â’n tenantiaid ynghylch cyflwyno gwelliannau megis gwasanaeth apwyntiadau ar gyfer atgyweiriadau.

Mae Tai Ceredigion hefyd yn awyddus i sicrhau bod manteision economaidd ehangach i’r economi leol o ran creu cyfleoedd am swyddi drwy gynlluniau hyfforddiant a phrentisiaeth. Golygai hyn y byddai’r £40 miliwn o fuddsoddiad a gynllunnir yn dod â gwelliannau y mae mawr angen amdanynt i gartrefi tenantiaid a hefyd yn rhoi hwb i ddyfodol economaidd cymunedau yng Ngheredigion.

Ei werthoedd yw: 

• bod wedi’i leoli yng Ngheredigion
• bod â’r Iaith Gymraeg wrth graidd ei fusnes
• bod yn gyflogwr da gyda chyfleoedd am ddatblygiad gyrfaol
• bod cwrdd ag anghenion tai a chyflogaeth pobl leol yn ganolbwynt sylw ganddo 
• ymdrechu i wella’r economi leol
• sicrhau bod y bwrdd rheoli yn gynhwysol a’i fod wedi’i gyfansoddi’n gyfartal o rai wedi’u henwebu gan y Cyngor, tenantiaid a phobl annibynnol sy’n gallu dod â sgiliau a phrofiad priodol 
• bod â statws elusennol
• annog tenantiaid i fynd yn aelodau/gyfranddalwyr
• bod yn landlord da sy’n gofalu am atgyweiriadau’n brydlon ac yn darparu gwasanaethau hygyrch am renti fforddiadwy 
• rhoi sylw i anghenion ehangach y sir o ran adfywio a datblygiad cymunedol
• gwerthfawrogi cyfranogiad ystyrlon gan denantiaid mewn perthynas â datblygiad polisi, darparu gwasanaethau a rhaglenni buddsoddi ymlaen.

Yn ystod y 5 mlynedd nesaf, bydd Tai Ceredigion yn dod â chartrefi tenantiaid i fyny at Safon Ansawdd Tai Cymru (SATC) drwy fuddsoddi £40 miliwn yn y pum mlynedd gyntaf, a £136 miliwn dros gyfnod o ddeng mlynedd ar hugain i’w cynnal wrth y safon honno.