Plant ysgol yn helpu i ddewis enw ar gyfer byngalo newydd sbon yn eu pentref

Yn ddiweddar bu plant ysgol Tal-y-bont yn cymryd rhan mewn gweithdy arbennig i feddwl am enwau posibl ar gyfer y byngalo newydd sbon sydd wedi’i adeiladu’n bwrpasol ar gyfer teulu lleol yn eu pentref.

Hwn yw’r cartref newydd cyntaf o’i fath i Tai Ceredigion ei adeiladu, ac mae’r fenter wedi bod yn bosibl diolch i gymorth gan Gyngor Sir Ceredigion a Grant Tai Cymdeithasol gan Lywodraeth Cymru.

Aeth rhai aelodau o staff ynghyd â masgot Tai Ceredigion - “TC” - i’r ysgol er mwyn gofyn am help i feddwl am enwau i’w cyflwyno i Gyngor Sir Ceredigion. Bu’r ysgol yn gweithio am dros hanner awr i lunio rhestrau o enwau. Meddai Tia sydd ym Mlwyddyn 5, “Mae pob un ohonom wedi mwynhau’r gweithdy, ac rydym wedi creu llawer o restrau o enwau Cymraeg a Saesneg.”

Meddai Mr Jones, Pennaeth Ysgol Gymunedol Tal-y-bont, “Mae’n bwysig bod y plant yn ymwneud â’r gymuned leol, a dyma ffordd wych o’u cynnwys. Roedd y plant wrth eu bodd pan ofynnodd Tai Ceredigion am eu help, ac rydym yn gobeithio y bydd y Cyngor yn hoffi’r enwau a gyflwynwyd. Hoffem ddiolch hefyd i K&C Group, y contractwyr adeiladu, am roi tocynnau llyfrau i’r ysgol.”

Meddai Sian Davies, Ymgynghorydd Cyswllt â Phreswylwyr Tai Ceredigion ar gyfer yr ardal, “Cawsom ymateb ysgubol. Gan fod y disgyblion wedi meddwl am gynifer o enwau hyfryd, roedd yn anodd dewis y tri gorau, heb sôn am ddewis un enw i’w gyflwyno. Y tri enw a gyrhaeddodd y brig oedd ‘Swyn Ceulan’, ‘Awel yr Allt’ a ‘Deri Bach’, ac rydym yn awr yn disgwyl cadarnhad ynghylch pa enw a fydd yn cael ei dderbyn, cyn mynd ati i enwi’r byngalo.

Buddsoddi dros £600,000 mewn cartrefi yn Aberteifi er mwyn darparu gwres fforddiadwy i denantiaid

Yn ddiweddar, mae gwelliannau wedi’u cwblhau i du allan 69 o gartrefi Tai Ceredigion yn ardaloedd Ridgeway a Maes Henffordd yn Aberteifi er mwyn darparu gwres fforddiadwy i denantiaid. Mae gosod deunydd inswleiddio ar waliau allanol yr eiddo’n golygu bod y cartrefi hyn wedi’u hinswleiddio’n well yn awr a bod y tenantiaid yn arbed arian ar eu biliau gwresogi.

Roedd modd cyflawni’r gwaith o ganlyniad i grant gan Raglen Arbed Ynni yn y Gymuned Llywodraeth y DU a chynllun Arbed Llywodraeth Cymru. Mae cynllun Arbed yn targedu cartrefi mewn ardaloedd lle mae incwm pobl yn isel, er mwyn gwella safonau effeithlonrwydd ynni a lleihau biliau tanwydd. Mae Tai Ceredigion wedi llwyddo i gael bron i £600,000 gan y cynlluniau hyn.

Meddai John Griffiths, Gweinidog yr Amgylchedd, sy’n gyfrifol am gynllun Arbed, “Yn y cyfnod anodd hwn o safbwynt ariannol, mae sicrhau a chynnal cyflogaeth yn un o brif flaenoriaethau Llywodraeth Cymru. Mae cynllun Arbed yn enghraifft dda o gynaliadwyedd ar waith. Mae o fudd i breswylwyr, ac mae hefyd yn cefnogi’r economi leol a’r amgylchedd.”

Meddai Miss Nicholls, mam i 4 o blant sy’n denant ar ystâd Ridgeway yn Aberteifi, “Mae’r deunydd inswleiddio waliau allanol wedi gwneud cymaint o wahaniaeth i’n cartrefi. Mae rhai cartrefi wedi cael systemau gwres canolog newydd hefyd, sy’n wych gan fod llawer o’r systemau yn hen iawn. Bellach, rydym i gyd yn arbed arian ar ein costau gwresogi, ac mae hynny’n wych.”

Ychwanegodd Miss Morgan, “O’r blaen, roedd yn rhaid i ni adael y gwres ymlaen trwy’r nos gan fod y tŷ mor oer, ond erbyn hyn mae’n llawer cynhesach ac nid oes angen i ni wneud hynny. Bydd yn arbed cryn dipyn o arian!”

Meddai Mr Hutchinson, sy’n byw ar yr ystâd ers 41 mlynedd, “Nid yn unig y mae ein cartrefi wedi’u hinswleiddio’n well, ond maent hefyd yn edrych yn well ac maent yn fwy golau a deniadol. Mae’n bleser gweld yr ystâd ar ei newydd wedd.”

Meddai Llyr Edwards, Cyfarwyddwr Gwasanaethau Eiddo Tai Ceredigion, “Rydym wedi defnyddio’r cyllid i ddarparu pecyn o fesurau effeithlonrwydd ynni mewn cartrefi yn Aberteifi, er mwyn sicrhau bod ein tenantiaid yn arbed arian ar eu biliau tanwydd ac er mwyn cynnig cyfleoedd o ran cyflogaeth a chynnig hyfforddiant i gontractwyr lleol a’n Tîm Llafur Uniongyrchol ein hunain ynghylch gosod y cynnyrch inswleiddio. Rydym yn falch iawn ein bod wedi gallu sicrhau cyllid gan gynllun Arbed a’r Rhaglen Arbed Ynni yn y Gymuned.”