Croeso i wefan Tai Ceredigion

Bil Diwygio Lles

Llythyr i Aelodau Seneddol:

Ddydd Mawrth, bydd y Bil Diwygio Lles yn dychwelyd i Dŷ’r Cyffredin a bydd gennych gyfle i dderbyn gwelliant a fydd yn gwneud gwahaniaeth i fywydau miloedd o deuluoedd ledled y wlad sy’n byw mewn tai cymdeithasol.

Fel y gwyddoch, ar 14 Chwefror, pleidleisiodd yr Arglwyddi eto i gyfyngu ar effaith y dreth ar ystafelloedd gwely. Cefnogodd yr Arglwyddi welliant mwy cymedrol o lawer na’r un a ddaeth yn ôl i Dŷ’r Cyffredin y tro diwethaf. Cyflwynwyd y gwelliant gan yr Arglwydd Best sy’n aelod o’r meinciau croes ac mae’n golygu y bydd rhai grwpiau o bobl agored i niwed, gan gynnwys pobl anabl, gweddwon milwyr a’r rheini sy’n methu gweithio, yn cael eu hamddiffyn rhag y dreth ar ystafelloedd gwely oni bai eu bod yn gwrthod cymryd fflat addas lai o faint.

Mae’r ffeithiau’n frawychus. Y gwir amdani yw nad oes digon o gartrefi llai o faint ar gael ar gyfer pob aelwyd y byddai’r dreth ar ystafelloedd gwely yn effeithio arnynt. Mae Cartrefi Cymunedol Cymru o’r farn bod oddeutu 40,000 o denantiaid tai cymdeithasol yng Nghymru yn unig yn byw mewn eiddo sy’n rhy fawr iddynt, ac o ystyried bod yr amcangyfrifon eisoes yn awgrymu y bydd anghenion 248,000 o bobl heb eu diwallu tan 2026 – nid oes digon o eiddo llai o faint ar gael i bobl symud iddo.
 
Nid awydd direswm i fyw mewn cartref mwy o faint na’r hyn sydd ei angen sydd i gyfrif am y diffyg symud yn y sector, ond tagfa a gaiff ei chreu gan brinder tai fforddiadwy yn genedlaethol.

Da chi, derbyniwch welliant yr Arglwydd Best ddydd Mawrth. I rai o’r teuluoedd mwyaf agored i niwed yn eich etholaeth gallai eich cefnogaeth olygu’r gwahaniaeth rhwng cael deupen llinyn ynghyd a byw mewn tlodi.

Ymgynghorwyr Cyswllt â Phreswylwyr newydd yn hwyluso prosiect gwelliannau Tai Ceredigion

Mae Ymgynghorwyr Cyswllt â Phreswylwyr yn chwarae rôl allweddol mewn cymdeithas dai leol wrth iddi geisio sicrhau bod cartrefi’n cyrraedd Safon Ansawdd Tai Cymru. Mae Tai Ceredigion yn awyddus i gyflogi pobl leol, ac felly mae wedi creu chwech o swyddi newydd i helpu i hwyluso’r broses o wella cartrefi tenantiaid. Yn ddiweddar mae Sian Davies a Hayley D'Alessio wedi ymuno â thîm profiadol o bedwar o weithwyr sy’n ymgynghori â thenantiaid ynghylch y gwelliannau dybryd y mae angen eu gwneud i sicrhau bod eu cartrefi’n cyrraedd Safon Ansawdd Tai Cymru.

Meddai Llyr Edwards, Cyfarwyddwr Gwasanaethau Eiddo Tai Ceredigion, “Hoffem groesawu ein Hymgynghorwyr newydd i’r tîm a dymuno’n dda iddynt. Byddwn yn sicrhau bod pob un o gartrefi Tai Ceredigion yn cyrraedd Safon Ansawdd Tai Cymru yn ystod y tair blynedd nesaf. Mae hwn yn brosiect mawr iawn, a’n Hymgynghorwyr cyfeillgar fydd y prif bwynt cyswllt ar gyfer ein tenantiaid o safbwynt y gwaith a fydd yn cael ei wneud ar eu cartrefi.”

Meddai Sian Davies, “Ers ymuno â Tai Ceredigion cyn y Nadolig, rwy’ wedi helpu llawer o denantiaid gyda’r dewisiadau yr ydym yn eu cynnig, a threfnais i bod contractwyr yn gwneud gwaith ar adeg fwy cyfleus pan oedd gan denantiaid apwyntiadau ysbyty ac ymrwymiadau eraill. Mae’n waith sy’n rhoi llawer o foddhad, ac rwy’n edrych ymlaen at yr ychydig flynyddoedd nesaf ac at weld pethau’n cael eu cyflawni.”

Meddai Katy Williams, sy’n Ymgynghorwr Cyswllt â Phreswylwyr yng Ngogledd Ceredigion ers y llynedd, “Mae’n rôl eithriadol o ddiddorol, ac rwyf wrth fy modd yn ei chyflawni. Rydych yn cwrdd â llawer o wahanol bobl bob dydd, ac rwy’n gallu defnyddio fy sgiliau trefnu i gyd wrth gysylltu â chontractwyr a gwneud yn siŵr bod y tenantiaid yn fodlon â’r gwaith. Mae gweld y gwahaniaeth sy’n cael ei wneud i gartrefi pobl yn grêt ac yn rhoi llawer o foddhad.”

Mae Tai Ceredigion yn chwilio am denantiaid awyddus a brwdfrydig i ymuno â’r Bwrdd a dweud eu dweud

Eleni, bydd cyfle i denant gael ei ethol i Fwrdd Tai Ceredigion a mynegi barn am benderfyniadau a chynlluniau’r gymdeithas dai ar gyfer y dyfodol. Gall unrhyw un o denantiaid Tai Ceredigion gynnig am y swydd. Mae’n swydd wirfoddol, a chaiff costau yr eir iddynt eu had-dalu. Bydd y tenantiaid yn ethol un o’u plith yn y gwanwyn, a bydd y sawl a gaiff ei ethol yn ymuno â’r Bwrdd yn yr haf.

Mae Bwrdd Tai Ceredigion yn cynnwys 15 o wirfoddolwyr di-dâl sy’n cynnwys 5 tenant, 5 aelod a enwebir gan y Cyngor a 5 aelod annibynnol y mae pob un ohonynt yn cynnig gwahanol arbenigedd a phrofiad i’r gymdeithas. Mae rhywfaint o gyfrifoldeb yn perthyn i’r swydd, ac felly byddai’n ddoeth i ymgeiswyr gael ychydig o hyfforddiant a fydd yn cael ei ddarparu cyn yr etholiad.

Meddai Jim Scanlan, Cadeirydd y Grŵp Monitro Tenantiaid, “Mae’n allweddol bod tenantiaid Tai Ceredigion yn cael mynegi eu barn am yr hyn y mae’r gymdeithas dai yn ei wneud o ddydd i ddydd a’r hyn y mae’n ei gynllunio ar gyfer y dyfodol.  Mae’n hollbwysig, felly, bod tenantiaid yn ymgeisio am y swydd hon. Byddwn ni, y Grŵp Monitro Tenantiaid, yn darparu unrhyw hyfforddiant y gallai fod ei angen ar ymgeisydd, felly peidiwch â bod ofn ymgeisio. Cofiwch, mae eich adborth a’ch cyfranogiad yn hollbwysig i helpu i sicrhau bod Tai Ceredigion yn darparu’r gwasanaeth gorau posibl! Os oes gennych ddiddordeb, cysylltwch nawr â Sue Thomas, eich Ymgynghorydd Cyfranogiad Tenantiaid.”

Dyddiad cau ar gyfer ceisiadau Dydd Gwener 30 Mawrth 2012.